Ինդոնեզիայում հայտնաբերվել է աշխարհի ամենաերկար օձը (լուսանկարներ)

Ինդոնեզիայում հայտնաբերվել է աշխարհի ամենաերկար օձը, հայտնում է UPI գործակալությունը։

Գինեսի համաշխարհային ռեկորդների գիրքը պաշտոնապես հաստատել է, որ Մարոս շրջանում հայտնաբերված հսկայական պիթոնը հանդիսանում է երբևէ պաշտոնապես չափված ամենաերկար վայրի օձը։

Կազմակերպության փոխանցմամբ՝ ներկայացված ապացույցների մանրակրկիտ ուսումնասիրությունից հետո պարզվել է, որ էգ ցանցավոր պիթոնի երկարությունը կազմում է 7.2 մետր։

Նշվում է, որ օձին տվել են Իբու Բարոն անունը, որը թարգմանաբար նշանակում է «Բարոնուհի»։

Ցանցավոր պիթոնները համարվում են աշխարհի ամենաերկար օձատեսակներից մեկը․ սովորաբար դրանց չափահաս առանձնյակների երկարությունը հասնում է մինչև 5.8 մետրի։ Սակայն նոր հայտնաբերված նմուշը զգալիորեն գերազանցում է այդ ցուցանիշը՝ սահմանելով նոր համաշխարհային ռեկորդ։