ԵՄ-ն հաստատել է Թուրքիայի՝ որպես թեկնածու երկրի կարգավիճակը

Թուրքիայի արտգործնախարար Հաքան Ֆիդանը Անկարայում հանդիպել է ընդլայնման հարցերով եվրահանձնակատար Մարթա Կոսի հետ։ Հանդիպումից հետո կողմերը համատեղ հայտարարություն են տարածել, որով վերահաստատել են Թուրքիայի՝ որպես ԵՄ թեկնածու երկրի կարգավիճակը և ընդգծել երկկողմ հարաբերությունների ռազմավարական կարևորությունը փոփոխվող աշխարհաքաղաքական իրավիճակի պայմաններում, հաղորդում է Anadolu-ն։

Ֆիդանը և Կոսը նշել են տարբեր ոլորտներում համագործակցության դրական դինամիկան և պատրաստակամություն հայտնել երկխոսությունը վերածելու գործնական գործողությունների։ Մասնավորապես, նրանք ընդգծել են 2025 թվականի բարձր մակարդակի հանդիպումների կարևորությունը, որոնք նպաստել են ԵՄ-ի՝ Թուրքիայում փախստականների ծրագրերին շարունակական աջակցությանը և Թուրքիայի քաղաքացիների համար վիզայի պահանջների դյուրացմանը։

Կողմերն ընդգծել են անվտանգության, տնտեսական ինտեգրման և տարածաշրջանային կապակցվածության ոլորտներում համագործակցության ամրապնդման անհրաժեշտությունը։ Հատուկ ուշադրություն է դարձվել Սև ծովի, Հարավային Կովկասի և Կենտրոնական Ասիայի տարածաշրջաններում էներգետիկայի, տրանսպորտի, թվայնացման և առևտրի ոլորտներում համատեղ նախաձեռնությունների մշակմանը։

Առանձին վերահաստատվել է Թուրքիայի և ԵՄ-ի միջև Մաքսային միության արդիականացման կարևորությունը՝ հաշվի առնելով համաշխարհային առևտրի փոփոխությունները և տնտեսական կանաչ վերափոխումը: Նշվել է նաև Եվրոպական ներդրումային բանկի գործունեության վերսկսումը Թուրքիայում և ներդրումային համագործակցությունն ընդլայնելու մտադրությունը։

Կողմերը ողջունել, են Եվրոպական հանձնաժողովի որոշումը՝ պարզեցնելու Թուրքիայի քաղաքացիների համար բազմակի մուտքի Շենգենյան վիզաների տրամադրումը և համաձայնել, են ակտիվացնել երկխոսությունն առանց վիզաների ճանապարհորդության, անվտանգության և ներգաղթի վերաբերյալ։

Եվրահանձնակատար Կոսը հիշեցրել է օրենքի գերակայության և ժողովրդավարական չափանիշների կարևորությունն Անկարայի և Բրյուսելի միջև հարաբերություններում և ընդգծել ԵՄ պատժամիջոցների շրջանցումը կանխելու անհրաժեշտությունը: Նա համերաշխություն է հայտնել Թուրքիային 2023 թվականի երկրաշարժերի տարելիցի կապակցությամբ և վերահաստատել ԵՄ-ի ֆինանսական օգնությունը տուժած շրջանների վերականգնման համար։

Իր հերթին Ֆիդանը նշել է Թուրքիայի և ԵՄ-ի միջև համերաշխության կարևորությունը Եվրոպայում կայունության և բարգավաճման ապահովման գործում։