Բժիշկը նշել է սրտի խնդիրների վաղ նախանշանները

Սրտաբան Վիկտորիա Լեբեդը զգուշացրել է, որ սրտանոթային համակարգի խանգարումների վաղ նշաններ կարող են լինել գլխապտույտը, հանկարծակի թուլությունը և ուշագնացությունը՝ առանց ակնհայտ պատճառի։ Բժշկի խոսքով՝ նման ախտանշանները հաճախ կապված են ուղեղի արյունամատակարարման խանգարման հետ։

Լեբեդը նշել է, որ սրտի խնդիրների մասին կարող են վկայել նաև շնչահեղձությունը, արագացած կամ անկանոն սրտխփոցը և օդի պակասի զգացումը։ Սովորաբար դրանք ի հայտ են գալիս ֆիզիկական ծանրաբեռնվածության ժամանակ, սակայն երբեմն կարող են առաջանալ նաև հանգիստ վիճակում։

Բժիշկը հավելել է, որ վտանգի ազդանշան կարող են լինել նաև կրծքավանդակի սեղմող կամ այրող ցավերը, որոնք տարածվում են ձախ ձեռքի, ուսի, պարանոցի, ծնոտի կամ մեջքի հատված, ինչպես նաև ոտքերի ու կոճերի անբացատրելի այտուցները և դժվար վերահսկվող բարձր զարկերակային ճնշումը։ Այսպիսի ախտանշանների դեպքում խորհուրդ է տրվում ժամանակին դիմել բժշկի և ստուգել սրտի աշխատանքը։