Խարդախության գործ․ կինը ստիպել է աղջկան գումար վաստակել՝ «անեծք հանելու» պատրվակով

Ռուսաստանում խարդախության հերթական դեպքն է բացահայտվել․ մի կին, որը ներկայացել է որպես «շաման» և հոգեբան, ստիպել է երիտասարդ աղջկան գումար վաստակել՝ համոզելով, թե նրա վրա «տոհմական անեծք» կա։ Այս մասին հաղորդում է Mash տելեգրամյան ալիքը։

Աղբյուրի տվյալներով՝ Եկատերինբուրգի բնակչուհի Մարիային սոցիալական ցանցերում գրել է «շաման Լի» մականունով կեղծ մասնագետը և հայտարարել, որ կարող է հեռացնել «անեծքը»՝ պահանջելով ավելի քան մեկ միլիոն ռուբլի։ Քանի որ աղջիկը նման գումար չի ունեցել, կասկածյալը սկսել է ճնշում գործադրել և համոզել, որ գումար գտնելու այլ տարբերակ չկա։

Հաղորդվում է, որ աղջկան ուղարկել են Հայաստան՝ խոստանալով գաղտնի պահել նրա եկամտի աղբյուրը։ Իրավապահները արդեն ձերբակալել են կասկածյալին, որը մինչ ապրիլի 2-ը կգտնվի կալանքի տակ։ Նմանատիպ դեպքեր նախկինում ևս արձանագրվել են, երբ մարդիկ, հավատալով «անեծքների» մասին պատմություններին, մեծ գումարներ են փոխանցել խարդախներին։