Ռուսաստանը կոշտ է արձագանքել Ճապոնիայի հայտարարություններին Կուրիլյան կղզիների մասին

Ռուսաստանի Պետդումայի պատգամավոր Դմիտրի Նովիկովը հայտարարել է, որ Կուրիլյան կղզիների պատկանելության հարցը Մոսկվայի համար քննարկման ենթակա չէ։ Նրա խոսքով՝ Ռուսաստանի և Ճապոնիայի միջև խաղաղության պայմանագրի շուրջ նման քննարկումները կարող են միայն նոր լարվածություն առաջացնել երկու երկրների հարաբերություններում։

Ավելի վաղ Ճապոնիայի վարչապետ Սանաե Տակաիտին հայտարարել էր, որ Տոկիոն մտադիր է լուծել Կուրիլյան կղզիների տարածքային պատկանելության հարցը և խաղաղության պայմանագիր կնքել Ռուսաստանի հետ։ Նա նշել էր, որ երկու երկրների հարաբերությունները շարունակում են բարդ մնալ, իսկ մի շարք հարցեր՝ չլուծված։

Նովիկովը ընդգծել է, որ եթե Ճապոնիան պատրաստ է ընդունել Երկրորդ համաշխարհային պատերազմի արդյունքներով ձևավորված իրականությունը, ապա խաղաղ պայմանագրի ստորագրումը հնարավոր կլինի։ Սակայն, եթե խոսքը վերաբերում է կղզիների պատկանելությունը փոխելու փորձերին, ապա դա Ռուսաստանի համար անընդունելի է։ 2024 թվականին Ճապոնիայի կառավարությունը Հարավային Կուրիլները անվանել էր «Ռուսաստանի կողմից անօրինականորեն օկուպացված տարածքներ»՝ ընդգծելով, որ «հյուսիսային տարածքների» հարցը շարունակում է գլխավոր խնդիր մնալ երկկողմ հարաբերություններում։