Chanel-ը ապրանքային նշաններ է գրանցում Ռուսաստանում՝ հեռանալուց երկու տարի անց

Ֆրանսիական շքեղության հայտնի Chanel բրենդը, որը նախկինում դադարեցրել էր գործունեությունը Ռուսաստանում, երկու հայտ է ներկայացրել նույնանուն ապրանքային նշանների գրանցման համար։ Այս մասին տեղեկանում են Ռոսպատենտի տվյալներից, հաղորդում է ՏԱՍՍ գործակալությունը։

Հայտերը ներկայացվել են Շվեյցարիայից՝ «Chanel SARL» ընկերության կողմից, որը հանդիսանում է բրենդի իրավատերը։ Դրանք ուղարկվել են 2026 թվականի հունվարի 29-ին և փետրվարի 2-ին։ Գրանցումը վերաբերում է մի շարք ապրանքային խմբերի՝ ներառյալ տեքստիլ և կաշվի արտադրության սարքավորումներ, ձեռքի գործիքներ, մերսման և հիգիենայի սարքեր, կահույք, պահեստավորման պարագաներ, ինչպես նաև տեքստիլ արտադրանք։

Chanel-ը դադարեցրել էր գործունեությունը Ռուսաստանում 2022 թվականի մարտին, իսկ 2024-ի մարտին ամբողջությամբ փակել էր իր բուտիկները և լուծարել վարձակալության պայմանագրերը։ Մասնագետների գնահատմամբ՝ ապրանքային նշանների գրանցման հայտ ներկայացնելը պարտադիր չի նշանակում բրենդի վերադարձ ռուսական շուկա, այլ թույլ է տալիս պահպանել իրավական պաշտպանությունը երկրում։ Ավելի վաղ հաղորդվել էր, որ իտալական Prada նորաձևության տունը նույնպես Ռուսաստանում գրանցել է կոսմետիկայի համար նախատեսված ապրանքային նշան։