Ռուսների այցերը Չինաստան հասել են ռեկորդային մակարդակի

2025 թվականի չորրորդ եռամսյակում Ռուսաստանից Չինաստան կատարված ուղևորությունների թիվը հասել է ռեկորդային ցուցանիշի։ Չինաստանի վիճակագրական տվյալներին հղումով այս մասին հայտնում է «ՌԻԱ Նովոստի»-ն՝ նշելով, որ այդ ժամանակահատվածում գրանցվել է շուրջ 745,8 հազար ուղևորություն, ինչը տարեկան կտրվածքով աճել է մոտ 40 տոկոսով։

Առավել նկատելի աճ է արձանագրվել զբոսաշրջային և մասնավոր այցերի ոլորտում․ զբոսաշրջային ուղևորությունները աճել են գրեթե մեկ երրորդով՝ հասնելով 395,6 հազարի, իսկ մասնավոր այցերը՝ 1,8 անգամ՝ մինչև 231,1 հազար։ Միևնույն ժամանակ գործարար ուղևորությունների թիվը նվազել է մոտ 4 տոկոսով՝ կազմելով 28,7 հազար։

Ընդհանուր առմամբ 2025 թվականին ռուսաստանցիների ուղևորությունները Չինաստան աճել են 1,9 միլիոնից մինչև 2,47 միլիոն՝ դառնալով պատմության մեջ երկրորդ ամենաբարձր ցուցանիշը 2019 թվականից հետո։ Աճին նպաստել է 2025 թվականի սեպտեմբերի 15-ից Չինաստանի կողմից ռուսաստանցիների համար առանց վիզայի մուտքի թույլտվությունը, որը Ռուսաստանի նախագահ Վլադիմիր Պուտինը անվանել է բարեկամության նշան և խոստացել է կիրառել փոխադարձ քայլեր Չինաստանի քաղաքացիների համար։