Էպշտեյնի գործով նոր մանրամասներ․ ձերբակալությունից առաջ նա ծրագրել էր վավերագրական նախագիծ

Ամերիկացի ֆինանսիստ Ջեֆրի Էպշտեյնը ձերբակալությունից մի քանի ժամ առաջ քննարկել է վավերագրական նախագծի նկարահանումները իր կղզում՝ ԱՄՆ նախագահի նախկին խորհրդական Սթիվ Բենոնի հետ։ Այս մասին հաղորդում է «ՌԻԱ Նովոստի»-ն՝ հղում անելով ԱՄՆ արդարադատության նախարարության հրապարակած նյութերին։

Տվյալների համաձայն՝ 2019 թվականի հուլիսի 6-ին Բենոնը iMessage-ով հետաքրքրվել է՝ հնարավոր կլինի՞ նկարահանումներ իրականացնել կղզում, ինչին Էպշտեյնը դրական պատասխան է տվել։ Զրուցակիցները սկսել են քննարկել առաջիկա օրերի հնարավոր աշխատանքային գրաֆիկը, սակայն նույն օրը երեկոյան ֆինանսիստը հայտարարել է, որ չեղարկում է բոլոր ծրագրերը և այլևս չի պատասխանել հաղորդագրություններին։

Աղբյուրի փոխանցմամբ՝ նախատեսվող նախագիծը նպատակ ուներ ներկայացնել Էպշտեյնի ավելի դրական կերպար՝ նրա մասնակցությամբ գիտության և միջազգային քաղաքականության թեմաներով քննարկումների միջոցով։ Հրապարակված նյութերում ներառվել է նաև մոտ երկու ժամ տևողությամբ չմոնտաժված հարցազրույցը, որը, ենթադրաբար, նկարահանվել էր այդ նախագծի շրջանակում։ Ավելի վաղ Էպշտեյնի եղբայրը հայտարարել էր, որ ֆինանսիստի մահը կարող էր կապված լինել նրա հնարավոր բացահայտումների հետ։