Մալայզիայում արքայական արգելոցը փորձում է փրկել անհետացման եզրին գտնվող վագրերին

Մալայզիայում ստեղծվել է Հարավարևելյան Ասիայի առաջին «արքայական վագրերի արգելոցը», որի նպատակն է պաշտպանել Մալայական վագրի մնացած փոքրաթիվ պոպուլյացիան։ Նախաձեռնությունը պատկանում է Պահանգ նահանգի թագաժառանգ Թենգկու Հասանալ Իբրահիմ Ալամ Շահին, որը հիմնել է Save the Malayan Tiger ծրագիրը և ստեղծել Al-Sultan Abdullah Royal Tiger Reserve արգելոցը՝ Տաման Նեգարա ազգային պարկի հարակից տարածքներում։

Եթե 1950-ականներին Մալայզիայում ապրել է շուրջ 3000 վագր, ապա այսօր վայրի բնության մեջ մնացել է ընդամենը մոտ 150։ Նոր արգելոցը ավելի քան 30 տոկոսով ընդլայնել է պաշտպանվող անտառային տարածքը՝ ստեղծելով շուրջ 568 հազար հեկտար անվտանգ միջավայր, որտեղ վագրերը կարող են ազատորեն տեղաշարժվել, որս գտնել և բազմանալ։ Տարածքում տեղադրված հարյուրավոր տեսախցիկները և հակաորսագողային պարեկները արդեն արձանագրել են դրական արդյունքներ, այդ թվում՝ վագրի ձագերի հայտնաբերում։

Պահպանության ծրագիրը ներառում է նաև որսի կենդանիների պոպուլյացիայի վերականգնում, տեղական համայնքների ներգրավում և անտառների վերականգնման նախագծեր։ Միջազգային կազմակերպությունները ֆինանսական աջակցություն են տրամադրում նախաձեռնությանը, իսկ մասնագետները նշում են, որ անտառային տարածքների վերամիավորումը և կենդանիների ազատ տեղաշարժը կարող են վճռորոշ դեր ունենալ Մալայական վագրերի փրկության գործում։