«Apple Daily» թերթի հիմնադիր Ջիմի Լայը դատապարտվել է 20 տարվա ազատազրկման

Հոնկոնգում Չինաստանի ամենահայտնի քննադատներից մեկը՝ «Apple Daily» թերթի հիմնադիր, մեդիա մագնատ Ջիմի Լայը, դատապարտվել է 20 տարվա ազատազրկման՝ ազգային անվտանգության մասին օրենքը խախտելու մեղադրանքով, գրում է Reuters-ը։ Դատարանը նրան մեղավոր է ճանաչել օտար ուժերի հետ դավադրության և ապստամբական նյութերի հրապարակման համար։

Դատավորների խոսքով՝ 78-ամյա Լայը եղել է այդ գործողությունների «գլխավոր կազմակերպիչը», ինչի պատճառով ստացել է առավել խիստ պատիժը։ Նրա հետ միասին ազատազրկման են դատապարտվել նաև «Apple Daily»-ի վեց նախկին ղեկավար աշխատակիցներ և մի քանի այլ անձինք։

Լայը, որը Բրիտանիայի քաղաքացի է և հերքում է իրեն առաջադրված մեղադրանքները, հայտարարել է, որ ենթարկվում է քաղաքական հետապնդման։ Մեծ Բրիտանիայի վարչապետ Քիր Սթարմերը և ԱՄՆ նախագահ Դոնալդ Թրամփը բարձրացրել են նրա հարցը Չինաստանի ղեկավար Սի Ծինփինի հետ հանդիպումների ընթացքում։