Ուկրաինայի շուրջ բանակցությունների ձեռքբերումները «ջնջվել են». Լավրով

Ռուսաստանի արտաքին գործերի նախարար Սերգեյ Լավրովը հայտարարել է, որ Ուկրաինայի հարցով բանակցությունների ընթացքում ձեռք բերված բազմաթիվ արդյունքներ ժամանակի ընթացքում կորցրել են ուժը։ Նրա խոսքով՝ խոսքը վերաբերում է հատկապես 2022 թվականին Ստամբուլում անցկացված բանակցություններին։

Լավրովը նշել է, որ այն ժամանակ քննարկվող անվտանգության երաշխիքների համակարգը նախատեսում էր, որ պայմանավորվածությունների խախտման դեպքում երաշխավոր երկրները պետք է համատեղ որոշում ընդունեին կոնսենսուսի միջոցով։ Նրա գնահատմամբ՝ այդ մոտեցումն ընդունելի էր Մոսկվայի համար, սակայն հետագայում այն ամբողջությամբ անտեսվել է։

ՌԴ արտգործնախարարը հավելել է, որ ԱՄՆ նախագահ Դոնալդ Թրամփի վարչակազմը հասկանում է այս խնդիրները, և Մոսկվան տարբեր ուղիներով իր դիրքորոշումը փոխանցում է Վաշինգտոնին։ Նա նաև կոչ է արել չգերագնահատել այն հայտարարությունները, որոնցով ԱՄՆ-ը քննադատում է եվրոպական երկրներին և Ուկրաինայի ղեկավարությանը։