Շերեմետևոյում զինծառայողներից գումար հափշտակելու գործով չորս տաքսիստների կալանքը երկարաձգվել է

Մոսկվայի մարզի Խիմկիի դատարանը վեց ամսով երկարաձգել է Շերեմետևո օդանավակայանում զինծառայողներից և ուղևորներից գումար հափշտակելու մեջ մեղադրվող չորս տաքսիստների կալանքը։ Այս մասին հաղորդում է ՏԱՍՍ գործակալությունը։ Խոսքը Մահմուդովի, Խուսաինովի, Պավլովի և Շեխոյանի մասին է։

Դատարանի նիստի ընթացքում Պավլովը մասնակիորեն ընդունել է մեղքը, իսկ մյուս ամբաստանյալները հայտարարել են, որ իրենց դիրքորոշումը կներկայացնեն դատավարության հաջորդ փուլում։ Քննության վարկածով՝ 2018-ից մինչև 2022 թվականը մեղադրյալները համակարգված կերպով գումար են հափշտակել օդանավակայան ժամանող քաղաքացիներից, այդ թվում՝ հատուկ ռազմական գործողության մասնակիցներից։

Ըստ քննիչների՝ հանցավոր սխեման հիմնականում կապված է եղել տաքսիի ուղեվարձի կտրուկ բարձրացման հետ․ սկզբում առաջարկվել է ուղևորությունը իրականացնել ընդունելի գնով, սակայն վերջում պահանջված գումարը բազմապատկվել է՝ երբեմն 2 հազարից հասնելով մինչև 122 հազար ռուբլու։ Վճարումից հրաժարվելու դեպքում, ըստ տուժողների, կիրառվել են ֆիզիկական բռնության սպառնալիքներ։