Հրապարակվել է «դատաստանի օրվա» ինքնաթիռի հազվագյուտ լուսանկար

Սոցցանցերում հայտնվել է ռուսական Ил-86ВзПУ օդային կառավարման ինքնաթիռի՝ այսպես կոչված «դատաստանի օրվա ինքնաթիռի», հազվադեպ լուսանկար։ Կադրն հրապարակել է ռազմական օդաչու և Fighterbomber Telegram-ալիքի հեղինակն՝ ցույց տալով ինքնաթիռի օդում վառելիքով լիցքավորման գործընթացը։

Լուսանկարը արված է օդային լիցքավորող ինքնաթիռի բորտից․ դրանում երևում է Ил-86ВзПУ-ն, որը վառելիք է ստանում հատուկ լիցքավորման շտանգի միջոցով։ Հեղինակի խոսքով՝ նման կադրերը չափազանց հազվադեպ են, քանի որ այդ տեսակի օդանավերի գործողությունները սովորաբար փակ բնույթ ունեն։

Ил-86ВзПУ ինքնաթիռը նախատեսված է երկրի բարձրագույն ռազմական ղեկավարության տարհանման և զինված ուժերի կառավարման համար արտակարգ իրավիճակներում, այդ թվում՝ միջուկային պատերազմի պայմաններում։ Օդանավը համալրված է տարբեր զորատեսակների կառավարման համար նախատեսված ռադիոէլեկտրոնային համակարգերով և ունի ուժեղացված կառուցվածք, որը նվազեցնում է հնարավոր միջուկային հարվածի հետևանքները։