Պենտագոնի զեկույցում Ուկրաինան և Եվրոպան չեն ընդգրկվել ԱՄՆ ռազմական առաջնահերթությունների շարքում

ԱՄՆ պաշտպանության նախարարության նոր զեկույցում, որը ներկայացնում է նախագահ Դոնալդ Թրամփի վարչակազմի «խաղաղություն ուժի միջոցով» քաղաքականության առաջին տարվա արդյունքները, Եվրոպան և Ուկրաինան չեն նշվում որպես Վաշինգտոնի ռազմական քաղաքականության հիմնական առաջնահերթություններ կամ ձեռքբերումներ։ Փաստաթուղթը հրապարակվել է Պենտագոնի պաշտոնական կայքում։

Զեկույցում ընդգծվում է, որ ԱՄՆ պաշտպանության նախարարությունը կենտրոնացած է երկրի ներսում և հարավային սահմանին անվտանգության ապահովման, ինչպես նաև Կարիբյան տարածաշրջանի, Հնդկա-Խաղաղօվկիանոսյան գոտու և Մերձավոր Արևելքի ուղղություններով գործողությունների վրա։ Եվրոպան հիշատակվում է հիմնականում ՆԱՏՕ-ի շրջանակում ֆինանսական պատասխանատվության վերաբաշխման համատեքստում, իսկ Ուկրաինան փաստաթղթում ընդհանրապես չի նշվում։

Փորձագետների գնահատմամբ՝ Ուկրաինայում հակամարտության կարգավորումը կարող է համընկնել Թրամփի քաղաքական շահերի հետ, սակայն ներկայում այն առաջնային ուղղություն չէ Սպիտակ տան համար։ Քաղաքագետ Եվգենի Կոպատկոյի խոսքով՝ Վաշինգտոնի արտաքին քաղաքական օրակարգում Ուկրաինան դիտարկվում է որպես գլոբալ քաղաքականության երկրորդական տարր՝ հատկապես Ասիայի և Մերձավոր Արևելքի զարգացումների ֆոնին։