Գանան պատրաստ է ոսկի արտահանել Ռուսաստան

Աֆրիկյան Գանան հետաքրքրված է Ռուսաստանին ոսկու արտահանմամբ։ Այդ մասին հայտարարել է Մոսկվայում Գանայի դեսպան Կոմա Սթիմ Ջեհու-Ապպիան՝ ընդգծելով, որ երկիրը արդեն ունի գնված ոսկու պաշարներ, որոնք պատրաստ են արտահանման։ Տեղեկությունը փոխանցել է ՌԻԱ Նովոստին։

Դեսպանի խոսքով՝ Աքրան ցանկանում է ընդլայնել համագործակցությունը թանկարժեք մետաղների ոլորտում և զարգացնել առևտրային հարաբերությունները Ռուսաստանի հետ։ Միևնույն ժամանակ նշվում է, որ 2025 թվականի սկզբից ոսկու խոշոր գնորդների թվում առաջատար են եղել Լեհաստանն ու Ղազախստանը, որոնք համապատասխանաբար ձեռք են բերել 67,1 և 32,4 տոննա ոսկի։

Բաց աղբյուրների տվյալներով՝ Գանան աշխարհում ոսկու խոշոր արտադրողներից է և ընդգրկված է այդ ցուցակի առաջին տասնյակում։ Թանկարժեք մետաղը կազմում է երկրի արտահանման եկամուտների հիմնական մասը, իսկ խոշոր հանքարդյունաբերական ընկերությունների արդյունահանումը 2012 թվականի 2,2 միլիոն ունցիայից աճել է մինչև 3,08 միլիոն ունցիա՝ 2022 թվականին։