«Դատաստանի օրվա ռադիոն» երկու ժամում մի քանի գաղտնագրային հաղորդագրություն է փոխանցել

Կարճալիք հաճախականությամբ աշխատող հայտնի УВБ-76 ռադիոկայանը, որը հաճախ անվանում են «դատաստանի օրվա ռադիո», փետրվարի 11-ին կարճ ժամանակահատվածում մի շարք կոդավորված հաղորդագրություններ է փոխանցել։ Այդ մասին հայտնել է «УВБ-76 логи» Telegram-ալիքը, որը հետևում է կայանի եթերին։

Տեղեկությունների համաձայն՝ Մոսկվայի ժամանակով ժամը 09:05-ից սկսած եթերում հնչել է ընդհանուր առմամբ ութ հաղորդագրություն։ Սկզբում փոխանցվել են առանձին բառեր, որից հետո կայանը մոտ մեկ ժամ լռել է։ Այնուհետև ընդամենը 15 րոպեի ընթացքում եթերում կրկին հնչել են հինգ տարբեր կոդավորված բառեր, ինչը դիտորդները համարում են անսովոր ակտիվություն։

УВБ-76 ռադիոկայանը գործում է դեռ 1976 թվականից և ռադիոսիրողների շրջանում հայտնի է «բզզացող» մականունով՝ մշտական աղմուկի պատճառով։ Կայանը պարբերաբար փոխանցում է թվերից և բառերից կազմված կոդավորված հաղորդագրություններ, որոնց նշանակությունը պաշտոնապես չի բացահայտվում և հաճախ դառնում է տարբեր վարկածների ու քննարկումների թեմա։