CR․ Աշխարհի յուրաքանչյուր չորրորդ սմարթֆոնը iPhone է

Counterpoint Research-ի (CR) նոր ուսումնասիրության համաձայն՝ Apple և Samsung ընկերությունները հատել են մեկ միլիարդ ակտիվ սմարթֆոնների սահմանը։ Զեկույցում նշվում է, որ 2025 թվականին աշխարհում ակտիվ սմարթֆոնների ընդհանուր քանակը աճել է մոտ 2 տոկոսով, իսկ խոշոր արտադրողների մեծ մասի ակտիվ սարքերի թիվը գերազանցել է 200 միլիոնը։

Հետազոտության տվյալներով՝ այս ցուցանիշով առաջատարը Apple-ն է․ աշխարհում օգտագործվող յուրաքանչյուր չորրորդ սմարթֆոնը iPhone է։ Վերլուծաբանների գնահատմամբ՝ այս արդյունքը գրեթե անհասանելի ռեկորդ է շուկայի մյուս մասնակիցների համար։ 2025 թվականին Apple-ը շուկային ավելացրել է ավելի շատ նոր սարքեր, քան հաջորդ յոթ խոշոր արտադրողները միասին։

Ընդհանուր առմամբ Apple-ն ու Samsung-ը միասին կազմում են աշխարհում գործող սմարթֆոնների մոտ 44 տոկոսը։ Ավելի վաղ Counterpoint Research-ը հայտնել էր նաև, որ Apple-ը ԱՄՆ-ում հասել է սմարթֆոնների շուկայի պատմական առավելագույն բաժնին՝ մեկ տարվա ընթացքում այն բարձրացնելով 65 տոկոսից մինչև 69 տոկոս։