«Նովատեկ»-ի շահույթը 2025-ին կտրուկ նվազել է՝ գրեթե երեք անգամ

Ռուսաստանի խոշորագույն գազային ընկերություններից «Նովատեկ»-ի շահույթը 2025 թվականին նվազել է 2,7 անգամ՝ կազմելով 183 միլիարդ ռուբլի՝ նախորդ տարվա 493,4 միլիարդի փոխարեն։ Այս տվյալները ներկայացված են ընկերության հրապարակած համախմբված ֆինանսական հաշվետվությունում։

Ընկերության հասույթը նվազել է ավելի քիչ՝ 6,4 տոկոսով, հասնելով 1,445 տրիլիոն ռուբլու։ Առանց փոխարժեքային տարբերությունների ազդեցության հաշվարկված շահույթը կազմել է 207 միլիարդ ռուբլի, ինչը նույնպես 2,7 անգամ պակաս է նախորդ տարվա ցուցանիշից։

Ավելի վաղ հաղորդվել էր, որ ընկերությունը սկսել է հեղուկացված բնական գազի վաճառքը «Արկտիկա ՍՊԳ-2» նախագծից, որը ԱՄՆ պատժամիջոցների պատճառով երկար ժամանակ չէր կարողանում գնորդներ գտնել։ Reuters-ի տվյալներով՝ «Նովատեկ»-ը գործընկերներին առաջարկել է մինչև 30-40 տոկոս զեղչեր, իսկ Միջազգային էներգետիկ գործակալության գնահատմամբ՝ 2025 թվականին ռուսական հեղուկացված գազի արտահանումը ընդհանուր առմամբ նվազել է մոտ 7 տոկոսով։