Այսօր Ն.Ս.Օ.Տ.Տ. Գարեգին Երկրորդ Ամենայն Հայոց Կաթողիկոսի Անվանակոչության օրն է

Այսօր Հայ Առաքելական Սուրբ Եկեղեցին նշում է Ս. Վարդանանց զորավարների և 1036 վկաների տոնը: Սուրբեր, որոնք իրենց անմահ գործով եւ անուններով միշտ ներկա են։ «Նորահրաշ» Սուրբեր, որ շարականագրի բնութագրմամբ կանգնեցին «արիաբար ըմդդէմ մահու»՝ քաջաբար եւ խոհեմաբար։

Այսօր նաև Ն.Ս.Օ.Տ.Տ. Գարեգին Երկրորդ Ամենայն Հայոց Կաթողիկոսի Անվանակոչության օրն է, քանզի Վարդանանց անկոտրում քաջերից էր աննահանջ Գարեգին իշխանը։

Վեհափառ Տեր, Արագածոտնի թեմի հոգևորականաց դասը և հավատացյալ ժողովուրդը որդիական սիրով, հավատարմությամբ և աղոթքով շնորհավորում են Ձերդ Վեհափառությանը Անվանակոչության տոնի առիթով:

Այս օրերին, երբ Հայ Առաքելական Սուրբ Եկեղեցին կանգնած է փորձությունների և մարտահրավերների առաջ, առավել տեսանելի է Ձեր Հայրապետական առաքելության ծանրությունն ու կարևորությունը։ Ձեր խաղաղ, բայց հաստատուն առաջնորդությունը, եկեղեցապահ հավատքը և ազգային պատասխանատվության գիտակցումը գոտեպնդում են հավատացյալ ժողովրդին և պահում Սուրբ Եկեղեցու միասնությունը։

Մենք վստահ ենք, որ փորձությունների միջով անցնող Եկեղեցին զորանում է աղոթքով, համբերությամբ և ճշմարտության մեջ հաստատակամ մնալով։ Այս ճանապարհին Ձեր ծառայությունն ու Հայրական ներկայությունը մեզ համար դառնում են հենարան:

Թող Տերը առավել զորացնի Ձեզ Իր շնորհներով, պարգևի առողջություն, երկարամյա խաղաղ ծառայություն, որպեսզի Ձեր հայրական օրհնության ներքո Հայ Առաքելական Սուրբ Եկեղեցին շարունակի իր առաքելությունը՝ որպես մեր ժողովրդի հոգևոր տուն, ուժի և հավատքի աղբյուր։

Աղոթքով և որդիական խոնարհությամբ Արագածոտնի թեմ