ԱՄՆ-ը պատրաստվում է Հնդկաստանին նոր սպառազինությունների հնարավոր վաճառքի

Վաշինգտոնի վարչակազմը կարծում է, որ Հնդկաստանի հետ առևտրի ոլորտում առկա վիճահարույց հարցերը գրեթե լուծված են և պատրաստվում է հանրապետությանը նոր սպառազինությունների հնարավոր վաճառքի։ Այդ մասին փետրվարի 11-ին հայտարարել է ԱՄՆ պետքարտուղարի՝ Հարավային և Կենտրոնական Ասիայի հարցերով օգնական Փոլ Կապուրը։

 

«Պաշտպանության ոլորտում մենք ունենք լայն օրակարգ։ Մենք հենց նոր ստորագրեցինք 10-ամյա շրջանակային համաձայնագիր։ Դա մեզ հնարավորություն կտա առաջընթաց գրանցել օպերատիվ փոխգործունակության, համատեղ զորավարժությունների անցկացման և այն բազմաթիվ ուղղություններով, որոնցով զբաղվել ենք վերջին տարիներին։Մենք կընդլայնենք այս գործունեությունը»,-նշել է նա Կոնգրեսի Ներկայացուցիչների պալատի արտաքին հարաբերությունների հանձնաժողովում լսումների ժամանակ՝ խոսելով ԱՄՆ-Հնդկաստան հարաբերությունների մասին։

 

Ավելի վաղ ԱՄՆ-ը և Հնդկաստանը հայտարարել են, որ համաձայնեցրել են առևտրային համաձայնագրի առաջին մասը, որի շրջանակում Վաշինգտոնը համաձայնել է Հնդկաստանից ներմուծվող արտադրանքի նկատմամբ մաքսատուրքերը նվազեցնել մինչև 18%։Ինչպես նշել են Նյու Դելիում, կողմերը շարունակում են տեխնիկական խորհրդակցությունները և նախատեսում են մինչև մարտի կեսերը ստորագրել պաշտոնական իրավական տեքստը։