Բրազիլական խոզի մսի արտահանումը դեպի Ռուսաստան կտրուկ աճել է

2026 թվականի հունվարի արդյունքներով Բրազիլիայից Ռուսաստան խոզի մսի արտահանումը դրամական արտահայտությամբ աճել է շուրջ յոթ անգամ՝ նախորդ տարվա նույն ժամանակահատվածի համեմատ։ Այս մասին հաղորդում է «ՌԻԱ Նովոստին»՝ հղում անելով Բրազիլիայի վիճակագրական ծառայության տվյալներին։ Հաշվետու ամսում ռուսական շուկա մատակարարված խոզի մսի վաճառքից բրազիլացի արտահանողների եկամուտը հասել է 1,7 միլիոն դոլարի, մինչդեռ 2025 թվականի հունվարին այդ ցուցանիշը կազմել էր ընդամենը 246,5 հազար դոլար։

Չնայած այս աճին՝ Ռուսաստանը դեռևս զգալիորեն զիջում է բրազիլական խոզի մսի հիմնական գնորդներին։ Տարվա սկզբին խոշորագույն ներմուծողը եղել են Ֆիլիպինները՝ շուրջ 75,2 միլիոն դոլարի գնումներով։ Առաջատար եռյակում ընդգրկվել են նաև Ճապոնիան՝ 42,7 միլիոն դոլար և Հոնկոնգը՝ 17,9 միլիոն դոլար արդյունքով։

Միևնույն ժամանակ, Բրազիլիայից խոզի մսի ներմուծման աճը գրանցվում է Ռուսաստանի ներքին շուկայում այս մսատեսակի պահանջարկի նվազման ֆոնին։ Մասնագետների խոսքով՝ սպառողական վարքագծի փոփոխության պատճառով խոզի միսը, նույնիսկ գների նվազման պայմաններում, շարունակում է թանկ մնալ բնակչության մի մասի համար, ինչի հետևանքով շատերը նախընտրում են ավելի մատչելի հավի միսը։ Վերլուծաբանները նշում են, որ այս միտումը կարող է վտանգել խոզաբուծական ոլորտի շահութաբերությունը։