23 տարի դատարանից թաքնված տղամարդուն հայտնաբերել են աղբավայրում

Սվերդլովսկի մարզի Պոլևսկոյե քաղաքում նախկին ճանապարհային ոստիկանն ավելի քան երկու տասնամյակ թաքնվել է արդարադատությունից՝ գործարաններից մեկից մետաղ գողանալու մեղադրանքով։ Այս մասին հայտնում է Ural Mash Telegram ալիքը։ Ըստ տվյալների՝ 2003 թվականին նա ընկերների հետ գործարանից հափշտակել էր մոտ 700 հազար ռուբլու մետաղ, ինչի համար նրան սպառնում էր մինչև յոթ տարվա ազատազրկում։

Դատարանի վճռի հրապարակման օրը տղամարդը չի ներկայացել նիստին։ Նա կնոջը հայտնել էր, թե գնում է ձկնորսության, սակայն այլևս տուն չի վերադարձել։ Իրավապահների որոնումները երկար ժամանակ արդյունք չէին տվել։

23 տարի անց նրան հայտնաբերել են․ պարզվել է, որ նա ապրել է մեկուսի կյանքով և աշխատել աղբավայրում։ Ավելի ուշ տղամարդը տեղափոխվել է Բերեզովսկի և սկսել ապրել մի կնոջ հետ, որը տեղյակ չի եղել նրա անցյալի մասին։ Իշխանությունները չեն հայտնել, թե ինչ հանգամանքներում է հաջողվել բացահայտել նրա գտնվելու վայրը։