Մահացել է հայտնի պատմաբան և Պուտինի մասին գրքերի հեղինակ Ռոյ Մեդվեդևը

100 տարեկան հասակում մահացել է հայտնի ռուս պատմաբան և հրապարակախոս Ռոյ Մեդվեդևը։ Նրա մահվան մասին ՏԱՍՍ գործակալությանը հայտնել են ընտանիքի անդամները։ Նախնական տեղեկություններով՝ մահվան հավանական պատճառը սրտային անբավարարությունն է։ Հրաժեշտի արարողությունը նախատեսվում է անցկացնել փետրվարի 17-ին՝ Օդինցովոյում։

Ռոյ Մեդվեդևը հեղինակել է ավելի քան 40 գիրք՝ նվիրված քաղաքական պատմությանը և հայտնի գործիչների կենսագրություններին։ Նրա առավել հայտնի աշխատություններից են «Դատաստանի առջև պատմությունը» և «Նրանք շրջապատում էին Ստալինին» գրքերը, որոնք մեծ տարածում են ստացել նաև արտերկրում։ 2000 թվականից նա մի շարք գրքեր է գրել Ռուսաստանի նախագահ Վլադիմիր Պուտինի մասին, այդ թվում՝ «Պուտինի գաղտնիքը» աշխատությունը։

Մեդվեդևը նաև խորհրդային դիսիդենտական շարժման ներկայացուցիչներից էր․ նա մասնակցել է «վաթսունականների» շարժմանը և հրապարակել է քաղաքական բարեփոխումների կոչեր պարունակող բաց նամակներ։ Նրա երկվորյակ եղբայրը՝ կենսաբան և գրող Ժորես Մեդվեդևը, մահացել էր 2018 թվականին։