Ռուսաստանում կնոջը տուգանել են Հնդկաստանում արված հին լուսանկարի պատճառով

Ռուսաստանի Նիժնի Նովգորոդ քաղաքում 52-ամյա կնոջը վարչական պատասխանատվության են ենթարկել՝ սոցիալական ցանցում հրապարակված լուսանկարի համար, որը նա արել էր Հնդկաստանում հանգստանալիս մոտ տասը տարի առաջ։ Տեղեկությունը տարածել են ռուսական լրատվական ալիքները՝ նշելով, որ իրավապահները լուսանկարը հայտնաբերել են սոցիալական ցանցերի մոնիթորինգի ընթացքում։

Լուսանկարում պատկերված էր տեսարժան վայրի դարպաս՝ սվաստիկայի պատկերով, ինչից հետո կնոջը մեղադրել են Ռուսաստանում արգելված խորհրդանիշի ցուցադրման մեջ։ Կինը բացատրել է, որ հրապարակելիս չի նկատել խորհրդանիշը և չի մտածել դրա հնարավոր իրավական հետևանքների մասին։ Նա նշել է, որ Հնդկաստանում սվաստիկան համարվում է հին խորհրդանիշ, որը կապված է հաջողության, բարեկեցության և արևի գաղափարների հետ, և այն լայնորեն օգտագործվում է նաև այլ ասիական երկրներում։

Չնայած պաշտպանական կողմի փաստարկներին՝ դատարանը կնոջը ճանաչել է մեղավոր վարչական հոդվածով և սահմանել հազար ռուբլի տուգանք։ Ավելի վաղ նմանատիպ դեպք էր գրանցվել նաև Ռուսաստանի Կրասնոդարի երկրամասում, որտեղ երիտասարդ տղամարդը պատժվել էր սոցիալական ցանցում պահպանված լուսանկարի պատճառով, որի վրա նույնպես առկա էր նույն խորհրդանիշը։