Եգոր Կրիդը շահել է դատը Telegram-ալիքի դեմ

Ռուս երգիչ Եգոր Կրիդը (Բուլատկին) շահել է դատական հայցը Telegram-ալիքի դեմ, որը նրան մեղադրել էր դպրոցական «Կարևորի մասին զրույցներ» դասընթացի ժամանակ իր համերգները գովազդելու մեջ։ Այդ մասին հայտնում են ռուսական լրատվամիջոցները՝ նշելով, որ գործը դատարանում քննվել է մի քանի փուլով։

Երգիչը դատարան էր դիմել դեռևս 2023 թվականին՝ պահանջելով 4,5 միլիոն ռուբլի փոխհատուցում՝ պատվի և արժանապատվության վիրավորանքի համար։ Հրապարակման մեջ նշվում էր, թե նա կրթական հանդիպման ընթացքում ոչ միայն մասնակցել է քննարկմանը, այլ նաև հայտարարել իր համերգների մասին և դասին մասնակցել է վճարովի հիմունքներով։ Սկզբում Մոսկվայի Սավելյովյան դատարանն ու քաղաքային դատարանը մերժել էին հայցը՝ համարելով, որ հրապարակումը հեղինակների սուբյեկտիվ կարծիքն է։

Սակայն Վճռաբեկ ատյանի դատարանը նշել է, որ փորձաքննությամբ լիարժեք չի ստուգվել հրապարակման փաստական ճշգրտությունը, ինչից հետո գործը վերադարձվել է կրկնակի քննության։ Վերջնական որոշմամբ դատարանը բավարարել է երգչի պահանջը։ Ավելի վաղ նաև հաղորդվել էր, որ Կրիդը անշարժ գույք ունի արտասահմանում, այդ թվում՝ բնակարան Դուբայում։