Ռուսաստանում առաջարկում են վերահսկել երեխաների SIM-քարտերի օգտագործումը

Ռուսաստանում կարող են պարտավորեցնել բջջային կապի օպերատորներին հետևել երեխաների SIM-քարտերի օգտագործման ընթացքում կասկածելի ակտիվությանը։ Այդ մասին ՏԱՍՍ գործակալությանը հայտնել է Դաշնային խորհրդի թվային տնտեսության զարգացման խորհրդի փոխնախագահ, սենատոր Արտյոմ Շեյկինը՝ խոսելով նոր օրենսդրական նախաձեռնության մասին։

Նրա խոսքով՝ օրենքի նախագծում դեռևս հստակ մեխանիզմներ չեն սահմանվել, սակայն ապագայում հնարավոր է օպերատորների և պետական մարմինների վրա դրվեն լրացուցիչ պարտականություններ։ Նախատեսվում է, որ նման համակարգը կթույլատրի ծնողներին ավտոմատ ծանուցումներ ստանալ երեխայի հեռախոսահամարով իրականացվող կասկածելի զանգերի կամ գործողությունների մասին։ Նախաձեռնությունն այժմ գտնվում է տեխնիկական մշակման փուլում։

Երեխաների համար SIM-քարտերի ստեղծման մասին օրինագիծը արդեն ընդունվել է Պետդումայում առաջին ընթերցմամբ։ Այն ներառված է ինտերնետային խարդախությունների դեմ պայքարի միջոցառումների երկրորդ փաթեթում։ Նախագիծը նախատեսում է անչափահասների SIM-քարտերը կապել ծնողների հեռախոսահամարներին և գրանցել հատուկ ռեեստրում, ինչպես նաև կայքերում և առցանց ծառայություններում գրանցման ժամանակ հասանելի դարձնել օգտատիրոջ տարիքի մասին տվյալները։