Ուկրաինայում չկա որևէ էլեկտրակայան, որը չի տուժել ռուսական հարվածներից. Զելենսկի

Ուկրաինայի նախագահ Վոլոդիմիր Զելենսկին Մյունխենի անվտանգության համաժողովում հայտարարել է՝ երկրում չկա որևէ էլեկտրակայան, որը չի տուժել ռուսական հարձակումներից։ 

Նախագահի խոսքով՝ միայն հունվարին ուկրաինական ՀՕՊ-ը խոցել է շուրջ 6000 անօդաչու թռչող սարք, ավելի քան 150 հրթիռ և ավելի քան 5000 կառավարվող ավիառումբ։ Զելենսկին հակաօդային պաշտպանության վիճակը բնորոշել է որպես գոյության հարց և շնորհակալություն հայտնել Ուկրաինային աջակցող երկրներին՝ մասնավորապես Գերմանիային, Նորվեգիային, Նիդեռլանդներին և ԱՄՆ-ին։

Նա նաև քննադատել է Իրանի ղեկավարությանը՝ Ռուսաստանին անօդաչու սարքեր մատակարարելու համար՝ նշելով, որ այդ սարքերն օգտագործվում են ուկրաինական քաղաքների դեմ հարձակումներում, հայտնում են մի շարք միջազգային լրատվամիջոցներ։