Ռուսաստանում ցանկանում են նվազեցնել դեռևս չսերտիֆիկացված Ил-114-300 ինքնաթիռի արժեքը

Ռուսաստանի փոխվարչապետ Յուրի Տրուտնևը հանձնարարել է վերլուծել Ил-114-300 տարածաշրջանային ինքնաթիռի արտադրության և շահագործման արժեքը՝ այն նվազեցնելու նպատակով։ «Ռոսիյսկայա գազետա»-ի փոխանցմամբ՝ համապատասխան հանձնարարականը տրվել է արդյունաբերության նախարարությանը և «Ռոսավիացիա»-ին՝ պահպանելով անվտանգության և որակի պահանջները։

Ներկայում Ил-114-300-ը շարունակում է գտնվել սերտիֆիկացման փուլում։ Արտադրողի տվյալներով՝ հիմնական թռիչքային փորձարկումները իրականացվել են 2025 թվականին, իսկ այժմ շարունակվում են լրացուցիչ ստուգումները։ Առաջիկա ամիսներին նախատեսվում են փորձարկումներ ամպրոպի պայմաններում, ինչպես նաև բնական սառցակալման պայմաններում՝ Արխանգելսկի մարզում և Սաբետտա օդանավակայանում։ Թռիչքային փորձարկումներին մասնակցում են երկու փորձնական ինքնաթիռներ, ևս մեկը անցնում է ցամաքային ստուգումներ։

Իլ-114-300 տուրբոպտուտակային ինքնաթիռը նախատեսված է մոտ 68 ուղևորի համար և պետք է փոխարինի խորհրդային արտադրության Ան-24 օդանավերին, ինչպես նաև որոշ արտասահմանյան տարածաշրջանային մոդելների։ Նախատեսվում է, որ 2028 թվականից Դալնևոստոկի «Ավրորա» ավիաընկերությունը կստանա նման ինքնաթիռների առաջին խմբաքանակը։