Իլոն Մասկը խոստացել է 10 տարվա ընթացքում Լուսնի վրա «ինքնազարգացող քաղաք» կառուցել

Ամերիկացի միլիարդատեր, SpaceX տիեզերական և աերոտիեզերական ընկերության գործադիր տնօրեն Իլոն Մասկը հայտարարել է, որ SpaceX-ը կենտրոնանալու է Լուսնի վրա «ինքնազարգացող քաղաքի» կառուցման ուղղությամբ։ Նախագծի իրականացումը, ըստ Մասկի, կտևի մոտ 10 տարի, մինչդեռ Մարսի վրա քաղաքի կառուցումը կարող է տևել ավելի քան 20 տարի։

Նա բացատրել է, որ դեպի Մարս թռիչքները հնարավոր են միայն մոլորակների դասավորության ժամանակ, որոնք տեղի են ունենում յուրաքանչյուր 26 ամիսը մեկ և տևում են մոտ վեց ամիս։ Միևնույն ժամանակ, դեպի Լուսին թռիչքները կարող են իրականացվել յուրաքանչյուր 10 օրը մեկ, իսկ թռիչքն ինքնին տևում է ընդամենը մոտ երկու օր։

Ավելի վաղ The Wall Street Journal թերթը հայտնել էր, որ SpaceX-ը ներդրողներին տեղեկացրել է 2027 թվականի մարտին Լուսնի վրա վայրէջք կատարելու մտադրության, ինչպես նաև գործունեությունը շարունակելու ծրագրերի մասին: Նա մտադիր է ձեռք բերել xAI ընկերությունը և արհեստական բանականության միջոցով ստեղծել տվյալների մշակման տիեզերական կենտրոններ:

Մի քանի տարի առաջ NASA-ն պայմանագիր էր կնքել SpaceX-ի հետ՝ Starship-ը մշակելու համար, որը կարող է միանալ գործակալության տիեզերանավին լուսնային ուղեծրում և ամերիկացի տիեզերագնացներին հասցնել Լուսնի մակերես։