Ֆիզիկական պասիվությունը կարող է մեծացնել շաքարային դիաբետի բարդությունների ռիսկը

Միջազգային լայնածավալ հետազոտությունը ցույց է տվել, որ ֆիզիկական ակտիվության պակասը կարող է նպաստել երկրորդ տիպի շաքարային դիաբետի բարդությունների զարգացմանը։ Աշխատանքը հրապարակվել է Journal of Sport and Health Science գիտական հանդեսում։

Գիտնականները վերլուծել են աշխարհի տարբեր երկրներից շուրջ 2,4 միլիոն մարդու տվյալներ՝ ուսումնասիրելով ֆիզիկական ակտիվության մակարդակի և հիվանդության բարդությունների միջև կապը։ Պարզվել է, որ շաբաթական առնվազն 150 րոպե միջին կամ ինտենսիվ շարժման բացակայությունը կապված է մի շարք առողջական խնդիրների ավելի բարձր ռիսկի հետ։

Հետազոտության արդյունքների համաձայն՝ ֆիզիկական պասիվությունը կապված է դիաբետով մարդկանց մոտ ինսուլտի դեպքերի շուրջ 10 տոկոսի, դիաբետիկ ռետինոպաթիայի մոտ 9,7 տոկոսի, ինչպես նաև սրտային անբավարարության և սրտի իշեմիկ հիվանդության զգալի մասի հետ։ Գիտնականները նշում են, որ շարժունակության ավելացումը կարող է կանխել այդ բարդությունների մի մասը և կարևոր դեր ունի հիվանդության վերահսկման մեջ։