Մեծն Մանսուրյանը

1939 թվականին այս օրը ծնվել է հայ կոմպոզիտոր, ՀԽՍՀ արվեստի վաստակավոր գործիչ Տիգրան Մանսուրյանը։

Կոմպոզիտորը հեղինակ է նվագախմբային, կամերային, երգչախմբային և վոկալ գործերի, որոնք կատարվել են ամբողջ աշխարհում։

Ծնվել է Բեյրութում, այնուհետև 1940-ականների վերջերին ընտանիքով ներգաղթել է Հայաստան։ Տիգրան Մանսուրյանը կոմպոզիցիա է սովորել 1956-1960-ին Երևանի Ռ.Մելիքյանի անվան երաժշտական ուսումնարանում, ապա 1960-1965-ին Երևանի կոմիտասի անվան պետական կոնսերվատորիայում՝ Ղազարոս Աղայանի դասարանում, ում ղեկավարությամբ և ավարտել է ասպիրանտուրան։                              

Ուսանողական տարիներին գրել է տարբեր ժանրի երկեր՝ արժանանալով բազմաթիվ մրցանակների։ Տիգրան Մանսուրյանը նախկին ԽՍՀՄ–ում ժամանակակից երաժշտության ռահվիրաններից մեկն է և առաջինը, ով կոմպոզիցիոն ժամանակակից հնարներ է ներմուծել Հայաստան։

«Մենք ենք մեր սարերը», «Ճերմակ անուրջներ», «Նռան գույնը», «Հին օրերի երգը» և շատ այլ ֆիլմեր առավել տպավորիչ են դարձել տաղանդաշատ կոմպոզիտորի ստեղծագործությունների շնորհիվ։

Կոմպոզիտորի ստեղծագործությունները մեծ հաջողությամբ են ընդունվում Լոնդոնում, Փարզում, Հռոմում, Միլանում, Վիեննայում, Մոսկվայում, Վարշավայում, Նյու–Յորքում, Լոս Անջելեսում և համաշխարհային երաժշտական այլ մայրաքաղաքներում։ Կոմպոզիտորի ստեղծագործությունները հայկական երաժշտարվեստի և ժողովրդական ավանդույթների հետաքրքիր միահյուսություն են' իրենց լուսապայծառ, արտահայտիչ մեղեդիներով և տպավորապաշտ, բարձրաճաշակ ու ընտիր հնչերանգներով։