Մասնագետը նշել է «թաքնված ալկոհոլիզմի» հիմնական նշանները

Թաքնված ալկոհոլային կախվածության վաղ նշանները հաճախ կարող են շփոթվել հուզական կամ վարքային փոփոխությունների հետ։ Այս մասին «Газета.Ru»-ին հայտնել է հոգեբույժ-նարկոլոգ Ռուսլան Իսաևը՝ ընդգծելով, որ նման կախվածությունը միշտ չէ, որ անմիջապես նկատելի է շրջապատի համար։

Բժշկի խոսքով՝ վտանգավոր ազդանշաններ կարող են լինել միայնակ կամ գաղտնի ալկոհոլ օգտագործելը, քնի կամ լարվածության հաղթահարման համար խմելու սովորությունը, ինչպես նաև հիշողության թուլացումը, ուշադրության նվազումը և խնդրի ժխտումը։ Նա նշել է, որ նման կախվածությունը հաճախ ավելի դժվար է նկատել, քանի որ այն կարող է երկար ժամանակ չարտահայտվել ակնհայտ ձևով։

Իսաևը նաև նշել է, որ թաքնված ալկոհոլիզմը համեմատաբար հաճախ հանդիպում է կանանց մոտ՝ ինչպես սոցիալական ճնշման, այնպես էլ օրգանիզմի կենսաբանական առանձնահատկությունների պատճառով։ Նրա խոսքով՝ ալկոհոլային կախվածության ռիսկը մեծանում է նաև հոգեկան խնդիրներ ունեցող մարդկանց մոտ, քանի որ նրանք հաճախ փորձում են ալկոհոլով թուլացնել իրենց վիճակը։