Հնդկաստանը խստացնում է վերահսկողությունը սոցցանցերի նկատմամբ

Հնդկաստանի տեղեկատվական տեխնոլոգիաների նախարար Աշվինի Վայշնավը հայտարարել է, որ համաշխարհային տեխնոլոգիական հարթակները՝ YouTube-ը, Meta-ն, X-ը և Netflix-ը, պարտավոր են գործել երկրի սահմանադրության և մշակութային միջավայրի շրջանակում։ Այս հայտարարությունը հնչել է այն բանից հետո, երբ Նյու Դելին խստացրել է անօրինական բովանդակության հեռացման կանոնները՝ կրճատելով դրա համար նախատեսված ժամկետը 36 ժամից մինչև ընդամենը երեք ժամ։

Նախարարը նաև ընդգծել է, որ անհրաժեշտ է ավելի խիստ վերահսկողություն deepfake-երի նկատմամբ, և այդ թեմայով արդեն սկսվել է քննարկում տեխնոլոգիական ընկերությունների հետ։ Հայտարարությունը հնչել է Դելիում անցկացվող արհեստական ինտելեկտի միջազգային գագաթնաժողովի շրջանակում, որտեղ մասնակցում են ինչպես աշխարհի առաջնորդներ, այնպես էլ խոշոր տեխնոլոգիական ընկերությունների ղեկավարներ։

Տեխնոլոգիական հարթակների նկատմամբ վերահսկողությունը խստացնելու միտումը նկատվում է ամբողջ աշխարհում։ Տարբեր երկրներ պահանջում են, որ սոցիալական ցանցերը արագ արձագանքեն վնասակար կամ անօրինական բովանդակությանը։ Օրինակ՝ Իսպանիայում դատախազությունը սկսել է հետաքննություն X-ի, Meta-ի և TikTok-ի դեմ՝ արհեստական ինտելեկտով ստեղծված ապօրինի նյութերի տարածման կասկածների պատճառով։