Ժողովուրդը թույլ չի տա «հանձնել» Դոնբասը․ Զելենսկի

Ուկրաինայի ժողովուրդը հանրաքվեով կմերժի խաղաղության համաձայնագիրը, եթե այն նախատեսում է Դոնբասի «հանձնում» Ռուսաստանին։ Նրանք, հավանաբար, կաջակցեն ներկայիս առաջնագծի սառեցմանը, հայտարարել է նախագահ Վլադիմիր Զելենսկին Axios-ին տված հարցազրույցում։

Պետության ղեկավարը հայտարարել է, որ պատրաստ է քննարկել Ուկրաինայի զինված ուժերի դուրսբերումը Դոնբասից, բայց Ռուսաստանը պետք է իր զորքերը դուրս բերի նույն հեռավորության վրա։ Նա նաև մերժել է Ռուսաստանի պնդումները տարածքի նկատմամբ ինքնիշխանության վերաբերյալ։

Զելենսկին նշել է, որ Վաշինգտոնն ու Կիևը համաձայնության են եկել, որ ցանկացած համաձայնագիր պետք է ներկայացվի հանրաքվեի։ Միևնույն ժամանակ, նախագահը կարծիք է հայտնել, որ եթե համաձայնագրում նշված լինի, որ ուկրաինական կողմը «պարզապես դուրս է գալիս Դոնբասից»՝ զոհաբերելով այնտեղ ապրող մարդկանց ինքնիշխանությունը, հասարակությունը չի աջակցի դրան։

«Զգացմունքային առումով մարդիկ երբեք չեն ներելու դա։ Երբեք։ Նրանք չեն ներելու... ինձ, նրանք չեն ներելու (Միացյալ Նահանգներին - խմբ.)», - ասել է Զելենսկին՝ հավելելով, որ ուկրաինացիները «չեն կարողանում հասկանալ», թե ինչու են իրենցից խնդրում հրաժարվել այդ տարածքներից։

«Սա մեր երկրի մի մասն է, այդ բոլոր քաղաքացիները, դրոշը, հողը», - ընդգծել է պետության ղեկավարը։

Եթե համաձայնագիրը պարզապես սառեցնի Դոնբասի ներկայիս առաջնագիծը, ինչպես նախատեսված է մյուս երկու շրջաններում, որտեղ մարտեր են ընթանում, Զելենսկին կարծում է, որ Ուկրաինայի ժողովուրդը կընդունի դա։

Զելենսկին նշել է, որ տարածքային հարցում առաջընթացի հասնելու լավագույն միջոցը Ռուսաստանի նախագահ  Վլադիմիր Պուտինի և իր հանդիպումն է։ Նա հայտնել է, որ հանձնարարել է իր թիմին Ժնևում առաջնորդների մակարդակով հանդիպում կազմակերպել։