Ռուսաստանում բենզինի գները նվազել են

Փետրվարի 18-ին Սանկտ Պետերբուրգի բորսայում բենզինի գները նվազել են։ Առևտրի տվյալների համաձայն՝ ԱԻ-92 տեսակի բենզինի արժեքը նվազել է ավելի քան 2 տոկոսով՝ հասնելով 60 998 ռուբլու մեկ տոննայի համար։ Մոսկվայի ժամանակով ժամը 15:05-ի դրությամբ գնի անկումը կազմել է 2,04 տոկոս՝ նախորդ առևտրային օրվա փակման ցուցանիշի համեմատ։

Ավելի փոքր չափով նվազել է նաև ԱԻ-95 տեսակի բենզինի գինը՝ 0,33 տոկոսով՝ մինչև 64 176 ռուբլի մեկ տոննայի դիմաց։ Նվազել են նաև դիզելային վառելիքի հիմնական տեսակների գները․ ամառային դիզելի արժեքը նվազել է 1,05 տոկոսով՝ հասնելով 55 292 ռուբլու, ձմեռայինը՝ 1,48 տոկոսով՝ մինչև 61 740 ռուբլի, իսկ միջսեզոնային դիզելի գինը նվազել է 0,13 տոկոսով՝ կազմելով 55 403 ռուբլի մեկ տոննայի համար։

Գների նվազումը մասնագետները կապում են երկրի ներսում վառելիքի մատակարարումների կայունացման հետ։ Փետրվարի 1-ից Ռուսաստանի իշխանությունները կրկին թույլատրել են ավտոբենզինի արտադրողներին վառելիք արտահանել արտաքին շուկաներ։ Միևնույն ժամանակ փորձագետները չեն բացառում, որ գարնանը, երբ ներքին պահանջարկը ավանդաբար աճում է, կառավարությունը կարող է կրկին սահմանափակել բենզինի արտահանումը՝ շուկայում հնարավոր ճգնաժամային իրավիճակներից խուսափելու համար։