Ռուսաստանում արձագանքել են Լուկաշենկոյի դեմ սահմանված պատժամիջոցներին

Ռուսաստանի Դաշնության խորհրդի պաշտպանության և անվտանգության հանձնաժողովի փոխնախագահ Կոնստանտին Բասյուկը «բացահայտ անհեթեթ և անճաշակ» է անվանել Ուկրաինայի կողմից Բելառուսի նախագահ Ալեքսանդր Լուկաշենկոյի դեմ սահմանված պատժամիջոցները։ Նրա հայտարարությունը փոխանցել է РИА Новости գործակալությունը։

Սենատորի խոսքով՝ Լուկաշենկոն դժվար թե լուրջ վերաբերվի այդ քայլերին, որոնք նա բնութագրել է որպես Կիևի հերթական ոչ բարեկամական գործողություն՝ ուղղված հակամարտության սրմանը և խաղաղ գործընթացի խափանմանը։ Բասյուկը նշել է, որ պատժամիջոցները կիրառվել են այն քաղաքական գործչի նկատմամբ, որը, նրա գնահատմամբ, երկար ժամանակ նպաստել է Ռուսաստանի և Ուկրաինայի հարաբերությունների պահպանմանը։

Ավելի վաղ Ուկրաինայի նախագահ Վլադիմիր Զելենսկին հայտարարել էր Լուկաշենկոյի դեմ պատժամիջոցներ սահմանելու մասին։ Դրանք ներառում են Ուկրաինա մուտքի արգելք, ակտիվների սառեցում, առևտրի և տարանցման դադարեցում, ինչպես նաև ֆինանսական գործարքների սահմանափակումներ։