Ռուսաստանում սկսել են կրճատել նավթային հորատումը

2025 թվականի արդյունքներով Ռուսաստանում նավթային հորատման ծավալները տարեկան կտրվածքով նվազել են 3,4 տոկոսով՝ հասնելով վերջին երեք տարվա նվազագույն ցուցանիշին՝ 29,14 հազար կիլոմետր։ Այս մասին, հղում անելով ոլորտի տվյալներին, գրում է Bloomberg-ը՝ նշելով, որ նման միտումը կարող է կասկածի տակ դնել նավթի արդյունահանման աճի հեռանկարները։

Տարվա առաջին կեսին հորատման ծավալները դեռ աճում էին, սակայն հունիսից սկսվել է անկում, և դեկտեմբերին ցուցանիշը նախորդ տարվա նույն ժամանակահատվածի համեմատ նվազել է շուրջ 16 տոկոսով։ Վերլուծաբանների գնահատմամբ՝ այս գործընթացը պայմանավորված է նավթի համաշխարհային գների նվազմամբ և պատժամիջոցների ուժեղացմամբ, ինչի հետևանքով նավթային ընկերությունների եկամուտները կրճատվել են։

Մասնագետները նշում են, որ ծախսերի կրճատման քաղաքականությունը կարող է ազդեցություն ունենալ արդյունահանման վրա որոշ ժամանակ անց՝ տեխնոլոգիական ուշացման պատճառով, հավանաբար 2026 թվականի երկրորդ կամ երրորդ եռամսյակում։ Միաժամանակ արտահանման և պահեստավորման խնդիրները նույնպես ճնշում են գործադրում ոլորտի վրա․ որոշ տվյալներով՝ տանկերներում կուտակվել է մոտ 150 միլիոն բարել նավթ, իսկ ցամաքային պահեստարանները արագորեն լցվում են, ինչը կարող է ստիպել ընկերություններին նվազեցնել արդյունահանումը։