Հաշվարկվել են Ռուսաստանի եկամուտները պարենային արտահանումից

Անցած տարվա արդյունքներով Ռուսաստանի ագրոարդյունաբերական համալիրի արտադրանքի արտահանումից ստացված ընդհանուր եկամուտը կազմել է 41,6 միլիարդ դոլար։ Այս մասին հայտարարել է Ռուսաստանի գյուղատնտեսության նախարար Օքսանա Լուտը, հաղորդում է ՏԱՍՍ գործակալությունը։

Նրա խոսքով՝ վերջին տասը տարվա ընթացքում ռուսական ագրոարտահանման արժեքը գրեթե եռապատկվել է։ Ռուսաստանը շարունակում է պահպանել աշխարհում ցորենի արտահանման առաջատարի դիրքը, իսկ արտադրության աճը հնարավորություն է տալիս ամրապնդել երկրի դիրքերը արտաքին շուկաներում։ 2025 թվականին Ռուսաստանը նաև մնացել է հանքային պարարտանյութերի խոշորագույն մատակարարներից մեկը․ տարվա ընթացքում արտահանվել է ավելի քան 44 միլիոն տոննա արտադրանք՝ մոտ 15 միլիարդ դոլարի չափով։

Միևնույն ժամանակ, նախարարի գնահատմամբ, ոլորտի հիմնական խնդիրներից մեկը շարունակում է մնալ ռուսական պարենային արտադրանքի համեմատաբար ցածր արժեքը միջազգային շուկայում։ Եթե այս խնդիրը չլուծվի, ապա մինչև 2030 թվականը ագրոարդյունաբերական արտադրանքի արտահանման մեկուկես անգամ աճ ապահովելու նպատակը կարող է դժվար հասանելի լինել։