Տաքսու վարորդը գողացել է ուրիշի ինքնությունը՝ հարկեր չվճարելու համար

ԱՄՆ Կալիֆոռնիա նահանգի բնակիչ Վահիկ Թաթուսին դարձել է ինքնության գողության զոհ․ անհայտ տաքսու վարորդը նրա տվյալներով գրանցվել է որպես Uber-ի վարորդ։ Այս մասին հայտնում է CBS News-ը։ Թաթուսին պատմել է, որ 2025 թվականին էլեկտրոնային նամակ է ստացել Uber-ից, որտեղ նշված էր, որ ինքը դարձել է ընկերության վարորդ, թեև երբեք նման փորձ չի արել։

Սկզբում նա այդ հաղորդագրությունը լուրջ չի ընդունել, սակայն հետագայում՝ դեկտեմբերին, ստացել է հարկային ծանուցումներ, որոնցում նշված էր, որ որպես Uber-ի վարորդ նա մի քանի հազար դոլար եկամուտ է ստացել։ Այդպիսով խարդախը փաստացի ստիպել է նրան վճարել իր փոխարեն հաշվարկված հարկերը։ Թաթուսին դիմել է հարկային ծառայություն՝ իրավիճակը պարզաբանելու համար։

Մասնագետները նշում են, որ թվայնացման պայմաններում ինքնության գողության դեպքերը հաճախանում են, հատկապես այն ոլորտներում, որտեղ աշխատանքի ընդունումը տեղի է ունենում առցանց հարթակների միջոցով։ Տուժողի կինը՝ Աննա Քոջոյանը, ընդգծել է, որ նման դեպքերը կարող են վտանգավոր լինել նաև ուղևորների համար, քանի որ նրանք միշտ չեն կարող վստահ լինել, թե իրականում ով է վարում մեքենան։