Նոր ռուսական ինքնաթիռը կփորձարկեն ծայրահեղ սառնամանիքներում

Ռուսական նոր տուրբոպտուտակավոր Ил-114-300 ինքնաթիռը, որը Ил-114-ի արդիականացված տարբերակն է, կանցնի փորձարկումներ մինչև մինուս 50 աստիճան ջերմաստիճանի պայմաններում։ Այս մասին հայտնել է «Իլ» ընկերության կառավարման տնօրեն Դանիիլ Բրեներմանը՝ խոսելով Միավորված ավիաշինական կորպորացիայի (ОАК) անունից, հաղորդում է ՏԱՍՍ-ը։

Փորձարկումները անցկացվում են Յակուտիայում, որտեղ օդի ջերմաստիճանն արդեն իջել է մինչև մինուս 43-45 աստիճան։ Բրեներմանի խոսքով՝ նախատեսվում է կրկին վերադառնալ տարածաշրջան տարվա վերջում կամ հաջորդ տարվա սկզբին՝ առավել խիստ սառնամանիքների շրջանում, որպեսզի հասնեն ծրագրում նախատեսված ցուցանիշներին։

Ինքնաթիռի սերտիֆիկացումը նախատեսվում է 2026 թվականի առաջին եռամսյակում, իսկ ավիաընկերությունների հետ մատակարարման պայմանագրերի կնքումը սպասվում է արդեն փետրվարին։ Ավելի վաղ Ռուսաստանի փոխվարչապետ Յուրի Տրուտնևը հանձնարարել էր վերլուծել Ил-114-300-ի արտադրության և շահագործման արժեքի ձևավորման գործոնները՝ գները նվազեցնելու նպատակով՝ առանց որակի և անվտանգության նվազեցման։