Չինաստանում ներկայացրել են ամերիկյան V-Bat-ին նմանվող անօդաչու սարք

Չինական AVIC ընկերությունը ներկայացրել է ուղղահայաց թռիչք և վայրէջք իրականացնող նոր անօդաչու թռչող սարք՝ Yunying անունով։ Defence Blog-ի հաղորդմամբ՝ նոր մշակումը կարող է հիշեցնել ամերիկյան Shield AI ընկերության V-Bat անօդաչուն, որը մատակարարվում է Ուկրաինային։

Սարքը ցուցադրվել է Իբին քաղաքում անցկացված փառատոնի ժամանակ, որտեղ տասը անօդաչուներից բաղկացած խումբը իրականացրել է ցուցադրական համատեղ թռիչք։ Yunying-ը կարող է ուղղահայաց բարձրանալ և վայրէջք կատարել, ինչպես նաև թռչել ինքնաթիռային տիպի դրոնի պես։ Թռիչքի համար անհրաժեշտ է մոտ երեք մետր կողմերով փոքր հարթակ։ Կան ինչպես բենզինային, այնպես էլ էլեկտրական շարժիչով տարբերակներ, իսկ սարքը համալրված է օպտիկա-էլեկտրոնային համակարգով՝ շուրջօրյա դիտարկման և հետախուզության համար։

Ըստ հրապարակման՝ չինական անօդաչուի ընդհանուր կառուցվածքը նման է արևմտյան V-Bat սարքին, թեև մշակողները ուղղակիորեն չեն նշել արտաքին նմանության մասին։ Վերլուծաբանները դա կապում են ուղղահայաց թռիչք և վայրէջք իրականացնող կոմպակտ անօդաչուների ոլորտում գլոբալ մրցակցության աճի հետ։