ԲՐԻԿՍ-ի երկիրը ցանկանում է ներմուծել ռուսական գազ

Իրանը փորձում է սկսել ռուսական գազի ներմուծումը։ Այդ մասին հայտարարել է երկրի նավթի նախարար Մոհսեն Փակնեժադը։ Նրա խոսքով՝ Թեհրանը շարունակաբար ավելացնում է գազի արդյունահանումը, որն արդեն հասել է օրական մոտ 750 միլիոն խորանարդ մետրի, սակայն ոլորտում դեռևս առկա է պահանջարկի և առաջարկի անհավասարակշռություն։ Այդ խնդիրը Իրանը ցանկանում է լուծել ռուսական գազի մատակարարումների միջոցով։

Իրանական կողմը նաև պատրաստակամություն է հայտնել ընդունել ռուսական ընկերությունների ներդրումները նավթագազային հանքավայրերում։ Իրանի ազգային գազային ընկերության ղեկավար Սաիդա Թավաքոլին նշել է, որ ռուսական գազի գնման պայմանագրի իրավական և առևտրային բոլոր կետերը գրեթե համաձայնեցված են։ Մնում է լուծել միայն երկու հարց՝ գնի ձևավորման մեխանիզմը և վճարման ձևը։

Նրա խոսքով՝ այդ հարցերի կարգավորումից հետո ռուսական գազի արտահանման պայմանագիրը կարող է անցնել իրականացման փուլ։ Միաժամանակ հիշեցվում է, որ 2025 թվականին Եվրամիությունը շարունակել է գնել ռուսական խողովակաշարային գազ՝ ընդհանուր առմամբ վճարելով մոտ 5,8 միլիարդ եվրո։