iPhone 17 Pro Max-ը դարձել է ամենաշատ վերավաճառվող սմարթֆոնը

Ամենաթանկ iPhone-ը անսպասելիորեն դարձել է երկրորդային շուկայում ամենաշատ վաճառվող սմարթֆոնը։ MacRumors-ի փոխանցմամբ՝ SellCell հարթակի տվյալները ցույց են տալիս, որ iPhone 17 Pro Max-ը փետրվարի սկզբի դրությամբ Apple-ի ամենապահանջված սարքն է վերավաճառքի շուկայում։ Ընդ որում՝ շատ օգտատերեր այն վաճառել են գնումից ընդամենը մի քանի ամիս անց։

Եթե նոյեմբերի վերջին մոդելի բաժինը վերավաճառքի շուկայում կազմում էր 5,1 տոկոս, ապա փետրվարին այն աճել է մինչև 11,5 տոկոս։ Թե ինչու են նոր սարքի սեփականատերերը որոշում հրաժարվել դրանից, հստակ չէ։ SellCell-ի մասնագետները ենթադրում են, որ պատճառը միայն սարքից հիասթափությունը չէ և իրավիճակը ավելի բարդ պատկեր է ներկայացնում։

Միաժամանակ նշվում է, որ iPhone 17 Pro Max-ը պահպանում է բարձր գին վերավաճառքի դեպքում․ միջինում դրա արժեքը մանրածախ գնից նվազել է ընդամենը 25 տոկոսով, իսկ վերավաճառված սարքերի շուրջ 86 տոկոսը գտնվում է իդեալական վիճակում։ Այնուամենայնիվ, մասնագետները իրավիճակը անոմալ են գնահատում, քանի որ սովորաբար վերավաճառքի ցուցակներում առաջատար են լինում ավելի հին մոդելները։