Ձևավորվել է ՆԳՆ հանցավորության վիճակագրության և հետազոտական կենտրոնը

Փաստահեն վերլուծությունը, կանխարգելման արդյունավետ գործիքների ներդրումն ու դեպքերի հետագծելիության ապահովումը հանցավորության դեմ արդյունավետ պայքարի ամբողջական շղթան է։

ՆԳ նախարարության կառուցվածքային բարեփոխումների շրջանակում հենց այդ մոտեցմամբ էլ ձևավորվել է Հանցավորության վիճակագրության և հետազոտական կենտրոնը, որի նպատակն է համակարգել տվյալների հավաքագրումն ու վերլուծությունը, նպաստել կանխարգելման արդյունավետ միջոցների մշակմանը, բարձրացնել հանցավորության դեմ պայքարի արդյունավետությունը։ Այս մասին տեղեկացնում են ՆԳՆ-ից:

«Նոր կենտրոնի ձևավորմամբ Ներքին գործերի նախարարությունը փորձում է լուծել երկու հիմնական խնդիր։ Առաջինը՝ ապահովել հստակ, ճշգրիտ վիճակագրության ձևավորում և երկրորդ՝ իրականացնել հանցավորության վերաբերյալ հիմնավոր քրեաբանական վերլուծություններ և հետազոտություններ, որոնք հետագայում կարող են օգտագործվել թե՛ Ներքին գործերի նախարարության, թե՛ այլ իրավապահ մարմինների կողմից հանցավորության կանխարգելման աշխատանքներում, ինչպես նաև իրենց աշխատանքի արդյունավետությունը գնահատելիս»,- ներկայացնում է Հանցավորության վիճակագրության և հետազոտական կենտրոնի պետ Գոհար Բեգոյանը:

Քրեական ոստիկանության գլխավոր վարչության պետ Վարդան Վարդանյանը խոսելով կենտրոնի կարևորության մասին՝ նշում է. «Կենտրոնի առաքելությունը նախ ճիշտ վիճակագրությունն ու որոշակի գործիքներ կիրառելով՝ վերլուծություն անելն է, որի տվյալները փոխանցելով մեզ՝ հնարավորություն կտա թե՛ կանխարգելման առումով ճիշտ պլանավորել աշխատանքը, թե՛ հանցագործությունների բացահայտման առումով պայքարել թիրախային հանցատեսակների դեմ»:

Հանցավորության վիճակագրության և հետազոտական կենտրոնի պետ Գոհար Բեգոյանի խոսքով՝ նախկինում վիճակագրությունը ամբողջությամբ չէր արտացոլում հանցավորության իրական պատկերը, քանի որ քրեաբանական խորքային վերլուծության բացակայությունը թույլ չէր տալիս վեր հանել հանցագործության իրական պատճառները. «Հանցավորության վիճակագրության և հետազոտական կենտրոնի գործունեությունը կրում է հանրապետական բնույթ, այսինքն՝ Կենտրոնում են հավաքագրվում և հաշվառվում հանցավորության վերաբերյալ բոլոր իրավապահ մարմինների կողմից ստացվող տվյալները։ Այսպիսով, այլ իրավապահ մարմինների հետ համագործակցությունը սկզբունքային նշանակություն ունի: Առանց ճշգրիտ տվյալներին հասանելիության չենք կարող խոսել ճշգրիտ և հստակ վիճակագրության, առավել ևս՝ այդ վիճակագրության վերլուծության մասին»:

ՔՈԳՎ պետ Վարդան Վարդանյանի խոսքով՝ կենտրոնի գործունեությունը միայն վիճակագրությամբ և վերլուծությամբ չի սահմանափակվելու. «Մենք ունենալու ենք նաև հանցագործություն կատարած անձի վարքագծի հետագծելիությունը»:
Կենտրոնի գործունեության կարևոր ուղղություններից է նաև վերլուծական աշխատանքներում երիտասարդ հետազոտողների ներգրավումը: Երիտասարդ հետազոտողների հետ համագործակցության շրջանակներում Ներքին գործերի նախարարությունը նախատեսում է ուսանողների և երիտասարդ մասնագետների ներգրավել տարբեր ուղղություններով հետազոտական աշխատանքներ իրականացնելու գործընթացում։

Գոհար Բեգոյանը նշում է, որ նորաստեղծ կենտրոնի գործունեությունը հիմնված է միջազգային լավագույն փորձի վրա և համահունչ է ՆԳ նախարարության բարեփոխումների օրակարգին։ «Կենտրոնի գործունեությունը կարևոր նշանակություն կունենա նաև վիզաների ազատականացման գործընթացում. կունենանք հանցավորության վերաբերյալ ճշգրիտ վիճակագրական տվյալներ, որոնց հիման վրա կկարողանանք առավել ճիշտ պլանավորել հանցավորության կանխարգելմանն ուղղված մեր գործողությունները»։

Կենտրոնի հաստիքների մեծ մասն արդեն համալրված է, և գործընթացը շարունակվում է։ ՆԳ նախարարի հրամանով հաստատվել է նաև կենտրոնի տարեկան ծրագիրը, որը ներառում է մի շարք միջոցառումներ՝ անձնակազմի կարողությունների զարգացում և տարբեր ուղղություններով հետազոտությունների իրականացում։

Մինչև տարեվերջ Կենտրոնում կգործարկվի արհեստական բանականության ժամանակակից գործիքներով հագեցած թվային հարթակը, կթվայնացվի դատվածության մասին տեղեկանքի ստացման գործընթացը, իսկ հանցավորության տվյալների բաց հարթակի գործարկմամբ քաղաքացիները կկարողանան թափանցիկ և մատչելի ձևաչափով հետևել պաշտոնական վիճակագրությանը։