Բժիշկները փրկել են տղամարդու, որը մեկ օր քայլել էր գլխում տրավմատիկ զենքի գնդակով

Ռուսաստանի Բառնաուլ քաղաքում շտապ բժշկական օգնության երկրամասային կլինիկական հիվանդանոցի նեյրովիրաբույժները փրկել են տղամարդու կյանքը, որը շուրջ մեկ օր անցկացրել էր գլխում տրավմատիկ զենքի գնդակով։ Տեղեկությունը հրապարակվել է բուժհաստատության պաշտոնական էջում։ Պացիենտը հունվարի 24-ին հիվանդանոց է տեղափոխվել անգիտակից վիճակում։

Համակարգչային տոմոգրաֆիան հայտնաբերել է գլխուղեղում բազմաթիվ մետաղական տարրեր։ Բժիշկների տվյալներով՝ տղամարդը վնասվածք էր ստացել տրավմատիկ զենքից, որի հետևանքով գնդակն ու բեկորները ներթափանցել էին ուղեղ։ Իրավիճակը բարդացել էր նրանով, որ նա մեկ օր չի դիմել բժշկական օգնության և հիվանդանոց է հասել միայն գիտակցությունը կորցնելուց հետո։

Վիրահատությունը տևել է շուրջ 2,5 ժամ։ Բժիշկները հեռացրել են ոսկրային բեկորները, վնասված ուղեղային հատվածները, ապա դուրս բերել գնդակը և վերացրել հեմատոման։ Հիվանդի վիճակը հաջողվել է կայունացնել և կանխել հետագա բարդությունները, սակայն կորցրած ֆունկցիաների լիարժեք վերականգնումը դեռ հարցականի տակ է։