Ռուսաստանում դատավորների պակասը հասնում է 15 տոկոսի. Պուտին

Ռուսաստանում առկա է դատավորների զգալի պակաս։ Այս մասին հայտարարել է Ռուսաստանի նախագահ Վլադիմիր Պուտինը՝ ելույթ ունենալով Գերագույն դատարանում անցկացվող ընդհանուր իրավասության, արբիտրաժային և ռազմական դատարանների տարեկան խորհրդակցության ժամանակ։ Նրա խոսքով՝ կադրային դեֆիցիտը կազմում է շուրջ 15 տոկոս։

Պուտինը նշել է, որ հատկապես ծանրաբեռնված են ընդհանուր իրավասության և արբիտրաժային դատարանները։ Միևնույն ժամանակ նա ընդգծել է, որ որևէ տեխնոլոգիա չի կարող փոխարինել դատավորին, և դատական որոշումները պետք է կայացվեն բացառապես մարդու կողմից։ Նախագահը դատական համակարգի ծանրաբեռնվածությունը գնահատել է որպես առաջնահերթ լուծում պահանջող խնդիր։

Պետության ղեկավարը կարևորել է նաև դատավորների բարձր մասնագիտական որակավորումը՝ ընդգծելով, որ դատական համակարգի համալրման հարցում պետք է պահպանվի բարձր չափանիշների նշաձողը։ Ավելի վաղ հաղորդվել էր, որ Ռուսաստանում մեկնարկել է դատական համակարգի կոռուպցիոն մաքրման լայնածավալ գործընթաց։