Նյու Մեքսիկոյի արդարադատության նախարարությունը ստուգում է Էպշտեյնի ռանչոյում սպանությունների մասին տեղեկությունները

Նյու Մեքսիկո նահանգի արդարադատության նախարարությունը սկսել է ստուգել տեղեկությունները ամերիկացի ֆինանսիստ Ջեֆրի Էպշտեյնի ռանչոյում ենթադրյալ սպանությունների վերաբերյալ։ Այս մասին հայտնում է Reuters գործակալությունը՝ հղում անելով գերատեսչության մամուլի ծառայությանը։ Նշվում է, որ նահանգային իշխանությունները ձեռնամուխ են եղել ակտիվ քննության և իրականացնում են ավելի լայնածավալ հետաքննություն։

Խոսքը վերաբերում է Էպշտեյնի գործի շրջանակում հրապարակված էլեկտրոնային նամակներում տեղ գտած հաղորդագրություններին, որոնցում նշվում է, թե Նյու Մեքսիկոյում գտնվող «Զորրո» ռանչոյի տարածքում թաղված են օտարերկրյա քաղաքացիություն ունեցող երկու աղջիկների մարմիններ։ Նահանգային արդարադատության նախարարությունը դիմել է նաև ԱՄՆ դաշնային իշխանություններին՝ հետաքննությանը աջակցելու համար։

Ավելի վաղ Կոնգրեսի անդամ Աննա Պաուլինա Լունան հայտարարել էր, որ Էպշտեյնի գործի քննության հետ կապված խնդիրները սկսվել են դեռևս Ջորջ Բուշ կրտսերի վարչակազմի օրոք։ Նրա խոսքով՝ հաջորդ նախագահների վարչակազմերն ու մի քանի գլխավոր դատախազներ տեղյակ են եղել խնդրի մասին, սակայն այն պատշաճ լուծում չի ստացել։