iPhone 17-ը Ռուսաստանում կրկին էժանացել է

Ռուսաստանում iPhone 17-ի գինը հասել է նոր ռեկորդային նվազման։ Hi-Tech Mail.ru-ի փոխանցմամբ՝ եթե փետրվարի սկզբին բազային մոդելը հնարավոր էր ձեռք բերել մոտ 70 հազար ռուբլով, ապա ամսվա կեսին նվազագույն գինը մարքեթփլեյսներում իջել է մինչև 67 հազար ռուբլի։

Մասնագետների գնահատմամբ՝ սմարթֆոնի արժեքը շարունակում է արագ անկում ապրել։ Համեմատության համար նշվում է, որ դեկտեմբերին նույն մոդելը վաճառվում էր շուրջ 82 հազար ռուբլով, իսկ 2025 թվականի սեպտեմբերին՝ վաճառքի մեկնարկին, դրա գինը կազմում էր 110 հազար ռուբլի։ Հրապարակման հեղինակները խորհուրդ են տալիս սարքը գնել փոքր օֆլայն խանութներից, որտեղ այն երբեմն ավելի մատչելի է, քան առցանց հարթակներում։

Նոր սերնդի iPhone 17-ը նախորդ iPhone 16-ից տարբերվում է 120 Հց թարմացման հաճախականությամբ էկրանով, նվազագույնը 256 ԳԲ ներքին հիշողությամբ և երկու 48 մեգապիքսելանոց տեսախցիկներով։ Սարքը աշխատում է A19 չիպով, ունի 8 ԳԲ օպերատիվ հիշողություն և 3692 միլիամպեր-ժամ տարողությամբ մարտկոց։ Ավելի վաղ հաղորդվել էր նաև, որ Ռուսաստանում էժանացել է iPhone 17 Pro մոդելը՝ հասնելով մոտ 95 հազար ռուբլու։