ՌԴ. Ուկրաինայից կարող էին տարհանել մինչև 200 ՆԱՏՕ-ի սպա՝ ծանր վիճակում

Ռուս վաստակավոր ռազմական օդաչու Վլադիմիր Պոպովը հայտարարել է, որ ՆԱՏՕ-ի երկրների սանիտարական ինքնաթիռները, որոնք պարբերաբար ժամանում են Լեհաստանի Ժեշուվ քաղաք՝ Ուկրաինայի սահմանի մոտ, կարող են Ուկրաինայից դուրս բերել ծանր վիրավոր արևմտյան զինծառայողների։ «Газета.Ru»-ի փոխանցմամբ՝ Պոպովը ենթադրել է, որ խոսքը կարող է գնալ մինչև 200 ՆԱՏՕ-ի սպաների մասին, որոնք հնարավոր է գտնվեն կոմայի վիճակում ռուսական հարվածներից հետո։

Պոպովի խոսքով՝ ինքնաթիռները դեպի Ժեշուվ տեղափոխում են դեղամիջոցներ և բժշկական սարքավորումներ, իսկ հետդարձի ճանապարհին տարհանում են վիրավորներին։ Նա նշել է, որ Ռուսաստանի զինված ուժերը վերջին շրջանում ակտիվացրել են հարվածները Ուկրաինայի արդյունաբերական և էներգետիկ կենտրոնների, ինչպես նաև հրամանատարական ու կապի հանգույցների ուղղությամբ, որտեղ, ըստ նրա, կարող էին գտնվել եվրոպական երկրների ռազմական խորհրդատուներ և հրահանգիչներ։

Օդաչուն հավելել է, որ ՆԱՏՕ-ի սանիտարական ինքնաթիռներում հնարավոր է տեղավորել մինչև 40 պառկած և մոտ 10 նստած վիրավոր, իսկ մի քանի բորտերի միջոցով հնարավոր է տեղափոխել շուրջ 200 մարդ։ Ավելի վաղ ռուս ռազմական բլոգեր Բորիս Ռոժինը հայտնել էր Ժեշուվում SAS ավիաընկերության Boeing 737 բժշկական ինքնաթիռի ժամանման մասին՝ ենթադրելով, որ դա կարող է վկայել ռուսական հարվածների արդյունավետության մասին։