ԱՄՆ ռազմական ուժերի կուտակումը մեծացնում է Իրանի վրա հարձակման ռիսկը

ԱՄՆ-ի կողմից տարածաշրջանում օդային և ծովային ուժերի ակտիվ կուտակումը մեծացնում է Իրանի դեմ հնարավոր հարվածի հավանականությունը, սակայն խաղաղ կարգավորման պատուհանը դեռ փակված չէ։ Այս մասին Sputnik-ին հայտնել է Ռազմավարությունների և տեխնոլոգիաների վերլուծության կենտրոնի (CAST) ավագ գիտաշխատող Յուրի Լյամինը։ Նրա խոսքով՝ Վաշինգտոնը տարածաշրջանում ձևավորում է լայնածավալ համակցված ռազմական խմբավորում՝ ներգրավելով տարբեր տեսակի կործանիչներ, ռազմավարական ռմբակոծիչներ, ավիակիրներ, հակաօդային պաշտպանության համակարգեր և հետախուզական ինքնաթիռներ։

Լյամինի գնահատմամբ՝ որքան ուժեղանա ամերիկյան ռազմական ներկայությունը, այնքան մեծ է հավանականությունը, որ ԱՄՆ-ը կարող է փորձել հանկարծակի և բարձր ինտենսիվությամբ հրթիռային հարված հասցնել Իրանի ղեկավարությանը, հրամանատարական կենտրոններին և հրթիռային բազաներին։

Միևնույն ժամանակ, նա նշում է, որ դեռևս հստակ չէ, թե Վաշինգտոնն ինչ ճանապարհ կընտրի՝ ռազմական էսկալացիա, թե բանակցություններ, գրում է Sputnik International-ը։